17/01/2019 （Thursday）
- 和平時一樣大慨7:30左右餵信妤，食量時間和平時都係差不多，每邊10分鐘左右。
- 今日係Thomas Lee放假之後第一日開門，我一早就跟爸爸講好，佢朝早送完信信返學就要即刻幫我去排隊睇醫生
- 8點多餵完信妤之後，我和婆婆發現妹妹呼吸很辛苦，喘得好利害，面色甚至有點變藍，我地好驚，婆婆掃拍左妹妹一陣，佢攰到訓著左。8:21am我打俾爸爸，話俾佢知信妤的情況，問佢我應該帶佢去Thomas度好定係急症好。同時打左俾朱阿姨（家政阿姨），睇下可唔可以叫佢唔好黎，但冇人聽。
- 基於我地怕去急症又俾人趕出黎，到時又miss左今日睇thomas嘅機會，加上妹妹訓左之後呼吸又正常番，所以最後都係決定睇左thomas先。
- 爸爸攞左12號籌，護士話最早10:30先返黎睇都得
- 我和婆婆見妹妹情況穩定番，於是我就揹住妹妹，和婆婆去飲咖啡。9:45左右回到家，我見仲未要出門口，又揹住妹妹做多陣公司野。10:15左右就離家帶信妤睇醫生，整段時間妹妹都係訓著。
- 婆婆因為要等朱阿姨黎，所以未有一齊前往睇醫生
- 10:30去到thomas果度，thomas仲睇緊10號籌，到睇信妤的時間已經係11點多
- Thomas醫生因為第一次睇信妤，所以要首先由頭開始將信妤的出生、病歷一一清楚講好，包括31/12到RNS求診的經過。一講到佢3個星期大時曾經腦膜炎，thomas仲提等佢好番要快D帶佢打腦炎針。佢先打左去RNS攞番31/12的樣本結果，RNS果邊講到信妤係中左某一隻virus，但個list寫明會驗好多其他野，RNS話唔知點解冇驗到。到佢開始檢查信妤，佢講左句"好明顯今日個肺咁樣就唔得啦"。又幫佢計呼吸等等⋯⋯佢同解釋睇小朋友有冇事就係睇"ABCD" - 信妤"B"reathing唔對路，所以帶佢黎睇醫生係正確做法。
- 佢都認為妹妹係細枝氣管炎，佢print 左張notes講有乜野red flag係要帶小朋友去醫院，喺果度咁多個point，其實妹妹只係勉強中"LESS THAN 3 MONTHS OLD"...（因為佢只係3個月多幾日）。Thomas話因為其實得呢個criteria勉強中，所以你可以自行決定去唔去醫院，不過如果俾我係你嘅話，我就會帶妹妹去急症。佢寫左張醫生紙俾我，我可以自己下一步決定點做
- 11:30左右睇完醫生後，我就轉述thomas嘅話俾爸爸聽。爸爸起初只係話叫我先帶妹妹去醫院，有咩到時再通知我。最後佢決定都係下午請假帶我和妹妹去急症
- 既然妹妹一切如常穩定（除左係因為揹得太耐佢開始有投訴外），我決定先去chatswood chase餵左妹妹先。11:52am開始餵妹妹，左邊8分鐘右邊11分鐘，佢胃口都似乎唔錯。餵完之後換片、又揹番。佢好快就訓左。於是我買定外賣等爸爸黎，我喺等緊爸爸黎嘅時間，去左kmart，打算要買幾件訓練握實的玩具俾妹妹，揀下揀下爸爸就到左，到俾錢先發現其中一件冇price tag，職員話我都唔知幾錢，求其當佢$5 ok ma...?快快俾完錢就去food court食外賣
- 會合爸爸之後第一件事就將妹妹放左喺capsule度，佢又冇醒喎，於是我和爸爸就決定先食埋lumch先去急症室。喺食飯成段時間，妹妹一路都係訓覺，我和爸爸當時甚至有唸過妹妹而家好地地，有冇必要去急症呢⋯⋯最後爸爸話反正都請左假，點都去一轉啦
- 到RNS的車程前半段時間信妤都訓得好好，靜到一個地步係爸爸趁紅燈的時候叫我望下坐喺後面的信妤，聽到稍微的呼吸聲先令我地放心番。當時我仲同爸爸講，佢訓得咁好，去到醫院應該又快又俾人趕番出黎啦。去到距離醫院最後幾分鐘的路程，我地留意到信妤醒左，同時呼吸聲又變得大聲，我跟爸爸說而家咁嘅呼吸聲醫院應該收啦卦⋯⋯
- 下午1:55到達RNS急症室，第一次中午去RNS的急症室，原來都坐左幾多人。護士好快就幫信妤登記左，我俾左佢睇信妤尋日下午呼吸的片段，再加上Thomas醫生信，護士話信妤應該可以in prority. 果然好快護士就安排我地入去兒科的急症室大房。
- 入到大房，有一兩個護士幫信妤做簡單檢查（check 體溫、血含氧量等），check完之後其實都係乾等著。此時的信妤，呼吸除左越來越大聲之外，口裡仲不停吐出mucus. 我抱著信妤，她的頭貼著的我膞頭，縰然爸爸不停用紙巾抹走從信妤口裡的mucus，但我件衫膊頭的位置依然是濕透了。
- 大約2:30左右，終於有醫生黎睇信妤，而且係跟31/12同一個醫生。佢最初唔記得我地，後尾佢記得我地就係31號去左the entrance day trip和有個brother叫Joshua果個family. 佢記得番我地之後好明顯態度認真起來，佢話既然信妤過左咁耐都未好，要第二次返黎嘅話我地會安排佢入院。其間佢將信妤的病況講左俾另一個著黑色衫心口寫住emergency specialist的醫生，我沒有太留意佢地之間的談話內容，但睇得出佢神情從容，令我心情都定下來。
- 兩個醫生傾左一陣又走開左，我抱著信妤和爸爸企喺床邊等，冇人同我地講等乜，大慨係等上房。等嘅期間爸爸同我吹下水，佢有個中學同學的兒子每逢進食都會好多痰...
- 等等下個emergency specialist推左部野黎話要幫妹妹做chest ultrasound。佢冇講點解，所以我理解係佢見我地等緊冇野好做就幫妹妹做住呢個檢查先，等上到房就可以做少樣野。我有問佢ultrasound有冇發現異樣，佢話冇乜發現。
- 又過左一陣，護士話趁仲安排緊上房，可以先幫妹妹打豆豆和插胃喉。護士當時話插胃喉嘅原因係方便餵野（我地get 到的意思係方便餵葯和餵奶（如有必要））
- 喺做呢兩樣野的期間，妹妹有好大的反抗，最初我地都以為係因為痛、唔舒服的正當反應。直到見到妹妹面色變藍，差不多有10幾個醫護人員立即圍住妹妹、俾氧氣等，當時醫護人員有考慮過即時送妹妹去resuscitation room，但最後都決定即場俾氧氣佢，而妹妹的面色亦都好快就回復正常。
- 我一見到妹妹變藍果下已經瘋狂大哭，到後來爸爸話妹妹冇事啦我仍然係喊到收唔到聲，這是我第一次覺得會隨時冇左妹妹。以前我覺得妹妹喺身邊係好理所當然的事，有時仲會唸我究竟係鍚信信多D定係信妤多D，果刻我才發現原來我真係好愛好愛妹妹，原來母親愛自己仔女係真係可以對住兩個一樣咁愛。
- 妹妹回復正常之後，醫護人員安排把妹妹轉到resuscitation room，果度明顯設備比較完善。有醫生不斷幫妹妹檢查，set up好多野monitor住妹妹的情況﹕有check心電圖、量血壓、氧氣幫助呼吸等等，著黑衫果個emergency specialist更加係寸步不離。過左一陣，有一個著行政套裝的醫生黎睇妹妹，佢話原本佢開緊會，但係收到消息所以立即落黎了解一下。佢同黑衫醫生傾左一陣，又研究了妹妹的scan record，我沒有留意佢地的談話內容，佢地亦都冇同我地point out 妹妹有乜野嚴重問題。
- 我其間不斷問幾時可以再餵妹妹，妹妹自中午之後冇食過野，我好擔心佢好肚餓，醫生話而家唔可以餵佢，驚佢會嘔。佢地幫妹妹吊住營養液，確保佢夠水份和營養。我pump完奶見到妹妹穩定番心情都定番好多，黑衫醫生將食指放入妹妹口中，妹妹不斷努力地吮。黑衫醫生見我過左黎就叫我做佢個位，戴住手套，俾隻食指俾妹妹吮。由妹妹吸吮的力度，我切切實實感受到妹妹當時係幾咁肚餓。我任由佢吸吮我的手指，直至到佢完全熟睡才放手。
- 黑衫醫生走開之後斷斷續續有同著行政套裝果個醫生密密針，最後佢向我地建議幫妹妹轉去兒童醫院，可以係westmead或者係randwick都得。爸爸話randwick地點上會方便D，於是黑衫醫生就video call去randwick果邊交代情況。妹妹經過求先呼吸果難及一大輪檢查之後已經疲累不堪，video call 果陣應該對方只係見到一個訓得好冧的信妤，唔會想像到求先咁危差的景況
- 完左call 之後黑衫醫生有再同我地解釋轉去兒童醫院係因為果度的設備會好D，同埋果度有ICU，妹妹會得到比較專業的照顧。(我當時get到嘅係呢間醫院既然連infant size吸痰的喉都冇，可能設備真係唔係太完善，加上剛剛果次大鑊野，可能去到兒童醫院會monitor得仔細D）
- 大約6:00左右出發去Randwick Sydney children hospital，6:45左右到達醫院。妹妹全程熟睡，連呼吸聲都好平靜。
- 跟著妹妹上救護車，我心裡面仲唸﹕我咁大個女都未撘過救護車，原來架車咁高身，坐到吊哂腳咁嘅。下次可以同信信講下媽媽都坐過ambulance，佢一定會覺得媽媽好犀利。
- 離開醫院前收到七姨send來的message - 「感謝神, 今早神提醒我為你們一家祈禱, 放心, 一切在神的手中, 會繼續代禱代求. 奉耶穌的名BB要得醫治! 求主看顧早日康復! 亞門!」我心唸，點解佢嘅消息會咁靈通！？唔通媽咪已經將妹妹入院嘅事"唱通街"！？於是我趁坐白車的時間將妹妹喺醫院嘅相send俾佢，佢大吃一驚，原來佢都唔知咁大件事。交代左少少病況，佢都有用金句鼓勵我 「在大水之時, 神坐著為王! 定睛仰望神! 你幼時咁嚴重神都救番你, 神是作事到如今的神. 將孩子交給衪吧! 人生路太長, 你擔唔起的. 神一早已經應計, 衪會擔起你的擔子, 加油啊! 」⋯⋯我當時只讀不回
- 去到Sydney children hospital，直接就被安排喺一入emergency 的第一張床"落腳"。醫護人員將妹妹由transport果個箱移到病床，開了氧氣，妹妹一直熟睡冇醒。救護員跟emergency department嘅護士交代好病況之後就離開。
- 過左一陣有護士同我準備信妤入院的paperwork. 再問我一次妹妹的病況、今日喺RNS的經過等等，我一一詳細交代了。之後佢問我想用邊個做妹妹的主診醫生，我霎時間腦袋一片空白，一來我唔熟識澳洲的醫療體系，唔知有得揀醫生，二來我完全唔識任何一個駐院醫生。護士話既然係咁就安排hala醫生做主診啦，佢只係收你由health fund和medicare claim到嘅錢做診金，沒有另外收費的。我同意了，護士亦一再話hala醫生係好有經驗的，可以放心好了
- paperwork做好之後，一直在等安排上房，其間有耐不時會有護士會望下妹妹，講下such a cute baby果D，又會順便問下我夠唔夠野食、洗唔洗飲野等等。護士見妹妺熟睡後呼吸正常，亦逐步將氧氣調低，亦都少左入黎。其間我問過護士幾次，幾時可以餵妹妹，佢地話安排上左房，見左醫生先可以餵。
- 9點左右，爸爸帶左婆婆準備的湯和外賣黎到emergency大房會合我地。接近10點，我地終於被安排上病房。
- 被安排上1樓的SHORT STAY 4人病房，靠近窗邊的房間。當時只有對面床有一對父母陪著一個小孩，我當時仲同爸爸"投訴"，我以為有health fund就可以住獨立房間呢⋯⋯
- 護士安頓好妹妹之後我又再問幾時先有醫生黎睇妹妹，希望快D睇完就可以餵番妹妹。此時妹妹已經超過9小時冇食奶，我心裡面最焦急都係驚佢會好肚餓。我和爸爸一邊等一邊食晚飯，食完飯過左冇耐終於叫到醫生。
- 醫生作簡單檢查後，建議兩種食奶的方案﹕第一樣係gravity feed，即係話透過胃喉，用針筒一次過將奶送到胃裏，咁樣做的好處係令妹妹將時會有飽肚的感覺。而且咁樣做嘅話，妹妹如果一唔舒服就可以即刻抽走D奶，個process always reversible. 第二個方法就係continuous feed，即係直接滴奶去胃度，因為每小時分量不多，所以妹妹唔會有飽肚的感覺，但至少佢會有足夠的水份和營養。聽完方案一和二，醫生都建議先行方案一，如果真係行唔通都可以重新再來行方案二，BB係我地的BOSS，佢會話俾我地知佢鍾意邊個方法多D。我當時一聽到方案一有即時飽肚感覺我就已經好buy，都冇唸太多就同意醫生立即實行方案一
- 餵完奶之後，醫護人員就離開了病房。過左冇幾耐我見到妹妹開始變得氣速，我叫爸爸立即出房搵護士入黎，爸爸出左去又唔好意思出聲咁又走返入黎，果時我見妹妹呼吸得好辛苦，我著急地再叫爸爸快D搵醫護人員黎，今次爸爸終於鼓起勇氣叫護士入黎睇妹妹
- 護士入到黎見妹妹情況咁嚴重，有變藍的情況，於是立即加大氧氣，並立即將奶從胃部抽出黎。抽奶之後，妹妹情況明顯變得好轉，呼吸緃然仍然急促，但起碼面色已經變回紅潤
- 醫生再幫妹妹檢查，話既然而家證明方案一不可行，那就用滴奶的方法，起碼妹妹今晚不用挨餓。開始滴奶後，妹妹的呼吸都慢慢平伏下來。
- 一切平靜下來後， 爸爸趁我洗澡的時候幫我整理床舖，安頓好一切爸爸走時已經係十一點多。
- 爸爸離開醫院後，我一直等佢回家。等到12:50先收到佢回到家的短訊，原來他回程的時候走錯了路，為左慳番$7 TOLL所以繞了個大圈才回到家。這晚我倆都累透了，話別前我告訴他房間剛進了第三個病人。
18/01/2019 （Friday）
- 半夜不斷聽到有人進進出出的聲音，第二朝先發現原來半夜收了兩個病人上房，四人大房一下子變得滿座。因為每次有新病人上房護士都要先檢查一大輪，好嘈，再加上護士每隔幾小時都會為信妤檢查。所以我成晚都訓得唔好。
- 第二朝一早6點半左右就起床了，妹妹的呼吸聲很重，但訓得好冧
- 上午護士建議我試下直接餵信妤，於是喺9:42am我直接用right
breastfeed左6分鐘。食完半個鐘都唔夠，信妤變得呼吸極度困難，於是我立即CALL護士入黎。其中一個護士尋晚有睇過妹妹食完12ml奶"速"的處埋方法，建議先抽番D奶出黎先，足足抽左40ml。護士有點怪責我，妹妹尋日食完12ml都咁"速"，你而家仲俾佢食咁多梗係辛苦啦。抽完之後，妹妹果然係舒服番好多
- 今日cleaner改早在8點黎，等爸爸開埋會 - 婆婆和爸爸大約10點半才到達醫院
- 之後Hala醫生帶埋一大隊人（有醫科學生、有尋晚接手信妤的醫生）幫妹妹檢查
- 佢話會幫信妤攞口水樣本睇下係咪viral定係bacterial infection. 會兩手準備俾定antibiotics，如果真係bacterial infection嘅話都唔會因為等化驗結果時間而延誤病情
- 我告訴她妹妹在RNS做了chest x-ray和 ultrasound，佢反一反眼，表示不明白點解會做ultrasound
- 佢話晏D會call ENT doctor黎幫妹妹檢查，以確定如果唔係viral infection的話，會唔會係structural問題，最likely 係raryngomalacia （floppy airway）要ENT黎rule out 呢樣野
- 佢星期六放假，所以treatment plan till Sunday就係oxygen + continuous feed.
- 中午左右，ENT doctor黎幫信妤檢查，好快就check左妹妹聲帶以上係冇結構上的問題。但係如果要check聲帶以下的情況，就要做全身麻醉先得。通常呢種情況會等好番先做，所以現階段可以rule out raryngomalacia
- 今日信妤係比較難settle，我突然想起尋日黑衫醫生的方法，戴上手套任由妹妹吸吮我的手指。妹妹好享受吮手指的時間，吮到我好似感覺手指都可以起皺，還以為手套都穿埋添。最後我work out到妹妹原來最享受一邊吮著我的尾指，一邊用手握著我的拇指，這樣帶給她很大的安全感，可以好好地睡上個多小時
- 婆婆驚我攰，所以靈機一觸用手套做了一隻小手指，妹妹係超級鍾意，可以完全代替人手，我地都話好方便呢。護士見到呢個新奇發明都笑了，又俾左個奶嘴，睇下妹妹鍾意邊樣多D。妹妹好努力學用護士俾果個奶嘴，但係個奶嘴真係太硬，佢吮幾下奶嘴就走出來，又令佢變得不耐煩
- 下午我趁爸爸和婆婆都在，午睡了個多小時。爸爸趁我訓覺的時間幫我打左去optus，簽左個1年plan，反正試過一次port number出事之後我都唔敢再轉台。
- 到四點左右，爸爸和婆婆回家接信信。快快食完飯，爸爸7:04pm 就用facetime打俾我，好讓信信可以見下妹妹，我又可以同信信say good night
- 爸爸剛好趕到喺8點前黎到醫院，放低我的晚餐就準備和google的recuiter傾電話。
- 夜晚對面床的麻煩友黎，當日剛好係佢5歲生日、撞親塊面、夜晚入院要立即做手術
19/01/2019 （Saturday）
- 星期六主診醫生因為放假，所以treatment plan和昨日大致一樣
- 原本和爸爸講好，朝早佢地會同信信去完游水班先過黎探妹妹。但8:45左右爸爸就打黎話佢地已經get ready好哂又唔知做乜好，不如先黎探下妹妹。
- 10點左右，爸爸、婆婆和信信到達醫院。兩日冇見信信，我好掛住佢。我一見佢黎到就急不及待陪佢喺隔黎嘅play room玩，玩到11點左右。其間有時婆婆陪住妹妹、有時爸爸陪住妹妹
- 信信游水班之後，爸爸、婆婆和信信又急不及待由lane cove返黎一齊食午餐。我地見到妹妹當時訓左，所以就一齊去左樓上嘅mcDonald house食外賣，以免信信太大聲嘈到其他病人和妹妹訓覺。
- 下午時間，護士推左個humidifier入黎，話呢個可以幫到妹妹呼吸。信妤用左之後果然呼吸好多，但係部機唔知係咩問題，每次水溫上升到某個點就會發出咇咇聲，不會再加熱。每次響的時候都要叫護士入黎唔知㩒下咩制就可以mute到佢，但隔幾分鐘又會再響。後來爸爸學左護士點㩒，就不用麻煩護士入黎了。
- 午飯之後，婆婆一直留在信妤床邊到差不多4點多，其間信妤大部份時間在睡，成日好似好攰，冇哂精神。成日都冇笑過，令到婆婆離開醫院後都好掛心。
- 佢地走左冇幾耐，護士入黎幫信妤檢查後，幫佢吸痰，食藥、換片。每次吸完痰妹妹的心跳都好快，快到有時最高見到240. 護士話因為妹妹隻腳郁，所以會度得唔準，所以唔洗太擔心。今次吸完痰妹妹都要用好耐時間先訓得番，而且訓黎呼吸聲係都係有D大。
- 到6點幾妹妹終於醒D，我扶佢起身佢都四圍望，心情好似唔錯。呼吸聲都係大，眼有點腫，但係都夠精神肯玩。到爸爸黎到之後，知道婆婆擔心信妤，所以都專登影左幾張我和信妤的合照希望令婆婆放心D
- 晚上9點左右，護士（果個護士好似叫jodie. 記得因為佢話佢一家5姊妹的名都start with "J", 所以Jessica呢個名令佢好有印象）再一次入黎幫妹妹檢查，話俾我地知今晚至少要吸一次痰，我心唸既然係咁嘅話，情願趁佢而家未訓的時候吸，吸完等佢夜晚可以有覺好訓。今次妹妹吸完痰之後都係呼吸好大聲，但都算好快settle就訓番。
- humidifier has been removed at night - 晚上9:45我臨訓的時候，humidifier依然不時響著咇咇聲。護士起初入黎嘗試fix部機，但後來又話fix唔到，要成部推走。我跟護士講，信妤用左humidifier 之後呼吸真係好左，你地可以繼續俾佢用嗎？我唔介意佢夜晚發出咇咇聲⋯⋯護士拒絕，佢話部機壞左，信妤根本嗅不到暖蒸氣的。我試著抗辯，因為我摸到條喉係暖的，怎可能話冇暖蒸氣呢？但兩個護士一邊話部機唔work，一邊就推部機出去。佢地話如果佢整得番呢部、或者搵到另一部嘅話就會推俾信妤用。最後當然不了了之。信妤停用左humidifier之後，呼吸立即冇咁好，再加上對面床果個媽媽睇youtube開到勁大聲，佢成晚都訓得麻麻。
20/01/2019 （Sunday）
- 婆婆話今日唔想返教會，想留喺醫院陪妹妹。為左唔想打亂信信的schedule, 爸爸決定早上先過來醫院，然後再帶信信返教會
- 婆婆 、爸爸和信信九點多一黎到醫院，我就立即將信妤交俾婆婆照顧，自己就把握他們返教會前嘅時間，爭取和信信相處的時間。
- 同信信玩果30-40分鐘時間，其間婆婆見到有護士黎幫信妤檢查，佢就過黎和我們交換位置，好讓我們能和護士溝通、詢問病況等⋯⋯當時護士只係幫信妤做例行檢查、探熱etc. 所以實際對話不多
- 十點多，信妤的主診醫生Dr Hala Katf仔細地幫信妤檢查，佢話信妤今日的情況好好多，建議可以停continuious feed. 停大約一個鐘後可以試下直接餵。我同醫生講之前試過直接餵5分鐘但速得好緊要，最後要抽番D奶出黎的事，於是佢建議我先pump D奶出黎先，然後先直接餵幾分鐘，等佢唔會一次過要食太多。日間時間用呢個方法餵，次數可以密D，但夜晚為左令信妤同我都有覺好訓，就可以用番continuious feed. 我亦都有問醫生，信妤每次吸痰之後心跳曾經上到220幾，咁嘅情況有冇問題，對佢有冇長遠影響。佢話就好似做完運動一樣，回慢慢回落番，長遠亦唔會對心臟有咩大影響
- 出左病房後，Hala醫生再同爸爸講，化驗報告出左，證實信妤係viral infection. 果隻菌係同31/12抽出黎化驗的菌相同，Hala醫生話佢已經確認過，呢個樣本結果係18/1抽出黎的樣本，不會有錯。換句話說，有可能係31/12果隻菌未清或者係31/12果次好番之後再感染同一隻菌。另外Hala醫生話信妤右肺好似有D影，但佢唔知係乜野，所以會再作further investigation. 另外因為ENT 上次睇過信妤聲帶以下都係clear，所以佢會安排speech therapist 星期一來幫妹妹檢查，睇下佢吞嚥有冇問題。下一步亦可能會約心臟科為信妤檢查。不過基於而家搵到係viral infection，應該7-10日會好得返，如果好番就當然唔洗做咁多野⋯⋯
- 醫生走後，爸爸就先離開帶了信信返教會。11點左右我問護士可唔可以幫我準備熱水，讓我們可以幫信妤沖涼。知道妹妹咁多日冇沖涼，而且情況有好轉，護士都好樂意、好快就推來一盤熱水。幾日冇沖涼對妹妹都會覺得好唔舒服，特別係頭髮都已經笠到油令令。婆婆好快幫佢沖完涼，妹妹心情、condition都好好，沖涼後護士再來幫妹妹作例行檢查，我告訴她醫生的話之後，佢就關掉continuous feed. 佢話趁妹妹而家醒左同埋未食奶前，佢想先幫佢吸痰，咁我餵完佢就可以直接訓覺。sounds like a good idea...所以我地就照咁做。吸痰的時候妹妹好似之前一樣爭札，心跳加速，但因為好快就吸完痰，佢都好快就平靜番。但一吸完我就已經留意到信妤口又有泡泡出來，於是我問護士係咪未吸完，佢話一吸完又有係正常，只要將喉嚨果積住果D吸走就可以。佢地知道每次吸痰對BB黎講係幾咁辛苦，所以免得過佢地係唔會吸
- 我按著醫生的吩咐，大約喺11:30開始先pump right breast大約40ml奶。11:39am開始餵信妤，佢好努力地吮，吮了right breast5分鐘，雖然我知佢未飽（因為實在真係冇乜奶出），但都冇辦法，要停一下。餵完之後信妤都有D"速"，有時要抱住，有時好D又可以放番上床。12:15pm婆婆留意到信妤打嗝，佢問我打信妤好定餵信妤好。我不忍心要打信妤，於是就話餵佢。餵了2分鐘，今次雖然時間係短D，但係好明顯感覺到有奶出。12:25pm信妤"速"得好利害，於是立即叫了護士入黎，我將整個feeding過程講哂出黎，包括加時兩分鐘feeding的原因都講了。佢有點怪責我胡亂加時，下次佢再打嗝都可以唔洗理。我問佢洗唔激轉番continuous feed，佢話唔洗。佢建議我抱住信妤，clam her down..
- 呢個時候佢留意到信妤個oxygen tube走左出黎，而且原來唔知由幾時開始，oxygen flow已經扭到去零。佢話既然信妤唔洗用oxygen tube都得嘅話，不如搣左佢掛喺床頭，方便我地抱信妤。因為果個tube係魔術貼設計，佢幾時再需要用嘅話可以再貼番上去就得，我們同意了。護士話過一陣佢會再入黎，如果信妤都係平靜唔到嘅話，先唸下一步點做。大約半小時後護士再入黎，信妤睡了。
- 大約3點，我又再按著醫生的吩咐先pump left breast大約40ml奶。3:18pm開始餵信妤，佢一樣好努力地吮，吮了6分鐘。和之前果次食完奶一樣，佢食完冇幾耐又"速"，我又按鐘叫護士入黎。今次真係按左好耐都冇人黎，我唯有自己抱著安撫信妤，過左冇耐佢又好似好D，於是我就放低佢喺床由她睡。信妤訓左一陣，終於有護士入黎，我話佢求先好"速"，不過而家已經訓左，咁佢當然就話由佢訓，仲話等佢醒先做例行檢查、食anti-biotics etc.
- 今次信妤訓嘅時間好短，大約40分鐘左右就俾痰"逐"醒左，於是我又叫護士（好似叫Jodie)入黎。佢嘗試幫妹妹打antibiotics喺豆豆果個位，但係條管屈左，所以打唔到葯。佢邊做邊投訴之前幫妹妹打豆豆果個護士做得唔夠好⋯⋯幾經辛苦，終於都通番條管，打到葯了。佢話其實個豆豆整得咁差，未來一兩日都一定要拆，加上可以用胃喉直接灌葯，所以豆豆的作用不大。佢建議今日就拆，等妹妹可以舒服D，我同意了。究意轉方法餵葯事前有冇得醫生同意，我就不得而知。
- 搞完一輪之後，妹妹又變得好攰，我掃下佢頭仔又再訓番。但到5點左右佢又俾痰"逐"醒左，變得好unsettle，我先幫佢換好片，然後又照之前一樣 先pump right breast大約40ml奶。5:15pm開始餵信妤，佢一樣好努力地吮，吮了5分鐘。和之前情況一樣，信妤食完奶冇幾耐就開始"速"，我又按鐘叫護士入黎。呢次又係按左好耐都冇人黎，我唯有自己抱著安撫信妤，過左冇耐有一個有金牙的黑人女護士入黎（果陣信妤已經好番D），佢話佢唔係負責呢張床，等一陣會叫負責佢果個護士先幫佢做例行檢查。我問佢會唔會磅下、和處理信妤的尿片，佢話放埋一邊先，等負責佢果個護士做。最後我安撫好信妤、等到佢訓著都未見過當值護士入黎。
- 徬晚對面床的「麻煩友」都走埋，四人大房一下子再變得平靜起來。我喺梳化床對出set up左個小小工作間，開左電腦，開始做下公司野。一邊做都不時會留意一下佢，一有聲又會走過去⋯⋯大約做到7:40左右，爸爸facetime過來，信信跟我big hug say goodnight之後還指定要見下妹妹。講完facetime無幾耐妹妹又變得unsettle. 於是我又好似之前一樣，先pump left breast大約40ml奶。今次我餵信妤之前，專登走去護士work station，見到Jeffrey（負責照顧信妤的護士）和之前有金牙果個護士都坐左喺果度，我問佢地需唔需要幫信妤吸痰，我話你地之前講過如果要吸痰就最好食奶之前吸，可以避免嘔奶。佢地互望一眼，講左句not necessary the case...Jeffrey答應晏D會再入黎觀察妹妹。於是喺8:18pm 開始餵信妤，同樣吮了5分鐘。
- 8:30pm左右爸爸到了醫院，信妤食完奶之後又有D"速"，和之前一樣按鐘叫護士卻冇人應。於是今次我叫爸爸影低video方便一陣show俾護士睇。過左一陣信妤平伏番好多，可以好clam咁伏在爸爸的肩膊上。我食完飯之後放番信妤到床上，佢仲好開心同我地講好多BB話、手腳都郁得好興奮。
- 9:30pm左右爸爸準備離開，離開前記起醫生講過夜晚要轉番continuous feed，等我同妹妹都可以有覺好訓。於是再叫jeffrey護士入黎，佢話佢完全唔知有呢回事，要出去睇一睇record先。臨走前我仲將5點幾和9點幾換出黎嘅尿片俾佢"處理"。
- 過左一陣佢帶埋一枝人奶入黎，set up番continuous feed部機。係咪即係佢由3點幾值班以來，根本冇睇過信妤的file?
- 臨訓前jeffrey介紹夜晚當更的護士給我認識，這是咁多晚以來我第一次見她負責照顧信妤，是很高大的一個女護士。jeffrey走左之後佢就幫信妤做例行檢查，佢話妹妹情況有好轉的話，可能明天就可以出院了。我話唔係嘛，佢一食完奶仲係"速"得好緊要喎，我咁樣唔放心俾佢出院喎。佢話呢間醫院唔會迫人出院，只要係個媽媽仲未feel comfortable to do so，妹妹都可以繼續monitor. 況且平時出院係下晝辦理的，我仲有成朝決定佢聽日出唔出院。
- 我自己都覺得要聽日出院係冇可能嘅事，不過為左唔想同佢再糾纏，求其笑下就打發佢走。我心裏面唸，佢接手嘅時候有冇睇過信妤的file，以佢嘅情況有冇可能聽日出到院?
- 10點左右，我見信妤仍然好精神，好想同我un goo，我又再同佢玩左一陣，跟住就摸埋佢的頭髮，跟她哼平時的"訓覺歌"，佢好快就合眼訓覺。
- 我臨訓同自己講，今晚的四人大房只有我地一張床，應該讓係信妤入院以來最平靜的一晚
